ချယ်လ်ဆီးအသင်းရဲ့ ကြယ်ပွင့်ကစားသမား အန်ဇိုဖာနန်ဒက်ဇ်က သူ့ရဲ့အနာဂတ်နဲ့ပတ်သက်ပြီး ကမ္ဘာ့ဖလားပြိုင်ပွဲအပြီးမှာ ဆွေးနွေးသွားမယ်လို့ အရိပ်အမြွက် ပြောကြားလိုက်ပါတယ်။

ချယ်လ်ဆီးအသင်းဟာ ချန်ပီယံလိဂ်ကနေ ထွက်ခွာခဲ့ရပြီးနောက်ပိုင်း နည်းပြ လီယမ်ရိုဆင်နီယာ လက်အောက်မှာလည်း ဇယားအဆင့်တက်လှမ်းနိုင်ဖို့ ဆက်တိုက်ရုန်းကန်နေရတာကြောင့် လာမယ့်အပြောင်းအရွှေ့ကာလမှာ ကစားသမားတော်တော်များများဟာ အသင်းကနေ ထွက်ခွာဖို့ ပြင်ဆင်နေကြတယ်လို့ သတင်းတွေက ဖော်ပြနေပါတယ်။

"ကျွန်တော် ကစားသမားတွေနဲ့ အမြဲတမ်း စကားပြောဖြစ်တာကြောင့် သူတို့နဲ့ ဆက်ဆံရေး အရမ်းကောင်းပါတယ်" လို့ ရိုဆင်နီယာက ကြာသပတေးနေ့မှာ ပြောကြားခဲ့ပါတယ်။

"ဘောလုံးအကြောင်း ဒါမှမဟုတ် စာချုပ်ကိစ္စတွေတင် မဟုတ်ဘဲ သူတို့ရဲ့ ဘဝအကြောင်း၊ သူတို့ကလေးတွေအကြောင်း၊ ကလေးတွေ နေကောင်းလား၊ ကျောင်းတက်ရတာ ဘယ်လိုလဲ ဆိုတာတွေအထိ ပြောဖြစ်ကြပါတယ်။"

"အန်ဇို အပါအဝင် တခြားကစားသမားတွေနဲ့လည်း ကျွန်တော်က အရမ်းရင်းနှီးပါတယ်။ စာချုပ်တွေနဲ့ သူတို့ ဘယ်မှာရှိနေချင်လဲဆိုတဲ့ အပိုင်းမှာတော့ ကျွန်တော် ဒီကိုရောက်လာကတည်းက နွေရာသီမှာ အသင်းမှာ ဆက်မနေချင်တော့ဘူးလို့ ပြောတဲ့ကစားသမား တစ်ယောက်မှ မရှိသေးပါဘူး" လို့ ၎င်းက ဆိုပါတယ်။

နွေရာသီနီးကပ်လာချိန်မှာ ရီးရဲလ်မက်ဒရစ်နဲ့ သတင်းထွက်နေတာနဲ့ ပတ်သက်ပြီး မေးမြန်းရာမှာတော့ ဖာနန်ဒက်ဇ်က လက်ရှိမှာ ဘာဆွေးနွေးမှုမှ မရှိသေးဘူးလို့ ငြင်းဆိုခဲ့ပေမဲ့ ကမ္ဘာ့ဖလားပြီးရင်တော့ ဆွေးနွေးဖို့ လမ်းဖွင့်ထားကြောင်း အရိပ်အမြွက် ပြောခဲ့ပါတယ်။

"ကမ္ဘာ့ဖလားပြီးရင်တော့ ဘာဖြစ်မလဲဆိုတာ စောင့်ကြည့်ရမှာပါ။ အခုအချိန်အထိတော့ ဘာမှ ဆွေးနွေးထားတာ မရှိသေးပါဘူး။ ရိုးရိုးသားသားပြောရရင် (ရီးရဲလ်နဲ့) ဘာမှ မရှိသေးပါဘူး။ အခုလောလောဆယ်တော့ ချယ်လ်ဆီးအသင်းနဲ့ ဒီရာသီရဲ့ လက်ကျန်ပွဲစဉ်တွေအပေါ်မှာပဲ အာရုံစိုက်ထားပါတယ်" လို့ သူက ဆိုပါတယ်။

Metro သတင်းဌာနရဲ့ ဖော်ပြချက်အရ ဖာနန်ဒက်ဇ်ရဲ့ အနာဂတ်ဟာ ချယ်လ်ဆီးအသင်း ဒီရာသီမှာ ဘယ်လိုအဆင့်နဲ့ အဆုံးသတ်မလဲဆိုတာနဲ့ လာမယ့်ရာသီမှာ ချန်ပီယံလိဂ် ဝင်ခွင့်ရမလား ဆိုတဲ့အပေါ်မှာ မူတည်နေပါတယ်။ အကယ်၍ ချန်ပီယံလိဂ်ဝင်ခွင့် မရဘူးဆိုရင် ဖာနန်ဒက်ဇ်ဟာ အသင်းပြောင်းဖို့ ကြိုးစားနိုင်ပြီး ရီးရဲလ်မက်ဒရစ်ကလည်း ရာသီအပြီးမှာ သူ့ကို ခေါ်ယူဖို့ စိတ်အားထက်သန်နေပုံ ရပါတယ်။