လီဗာပူးနည်းပြအီရာအိုလာက မက်အယ်လစ္စတာနဲ့ပတ်သက်လို့ ထွက်ပေါ်နေတဲ့ အပြောင်းအရွှေ့သတင်းတွေကို တုံ့ပြန်ပြောဆိုလိုက်ပါတယ်။

လီဗာပူးအသင်းက အခုနွေရာသီမှာ ဗစ်တာမူနော့ဇ်နဲ့ ဂျက်ကွက်တို့ကို ခေါ်ယူထားပေမဲ့ ကိုနာတေး၊ မိုဆာလက်နဲ့ ရော်ဘတ်ဆန်တို့လို အဓိကကစားသမားတွေကို လက်လွှတ်ထားရပါတယ်။ ဒါကြောင့် အသင်းကို ပြန်လည်တည်ဆောက်ဖို့ လိုအပ်နေချိန်မှာ အီရာအိုလာက နည်းပြအဖြစ် တာဝန်ယူခဲ့ပါတယ်။

အသင်းအတွက် ကစားသမားသစ်တွေ အားဖြည့်ဖို့ ကြိုးစားနေချိန် အီရာအိုလာက အမေရိကန်နိုင်ငံ၊ ချီကာဂိုမြို့မှာ ပြုလုပ်တဲ့ ရာသီကြိုခရီးစဉ်သတင်းစာရှင်းလင်းပွဲအတွင်း ပြီးခဲ့တဲ့သီတင်းပတ်၊ ရီးရဲလ်မက်ဒရစ်နဲ့ နာမည်ထွက်ခဲ့တဲ့ မက်အယ်လစ္စတာနဲ့ပတ်သက်လို့ အခုလို ပြောကြားခဲ့ပါတယ်။

"မက်အယ်လစ္စတာဆိုတာ ပြီးခဲ့တဲ့နှစ်အနည်းငယ်အတွင်း အသင်းအတွက်ရော၊ အခုကမ္ဘာ့ဖလားပြိုင်ပွဲမှာပါ အကောင်းဆုံးကစားသမားတစ်ဦး ဖြစ်ခဲ့ပါတယ်။ ဒါကြောင့် တခြားအသင်းတွေက ကျွန်တော်တို့ရဲ့အကောင်းဆုံးကစားသမားတွေကို လိုချင်ကြတယ်ဆိုတာ ပုံမှန်ပါပဲ" လို့ သူက ဆိုပါတယ်။

"ဒါမျိုး အပြောင်းအရွှေ့ဈေးကွက်တိုင်းမှာ ဖြစ်လေ့ရှိပါတယ်။ ဒါပေမဲ့ ကျွန်တော်ကတော့ ကိုယ့်ရဲ့ကစားသမားကောင်းတွေကို ဆက်ထိန်းထားချင်ပါတယ်။ ရှိပြီးသား ကစားသမားတွေကို လက်လွှတ်ရတာထက် ကစားသမားသစ်တွေ ခေါ်ယူဖို့ကိုပဲ ပိုပြီး အာရုံစိုက်နေပါတယ်" လို့လည်း သူက ထည့်သွင်းပြောကြားခဲ့ပါတယ်။

သတင်းထောက်မီဂွယ်လ်ဆာရာနိုရဲ့အဆိုအရ မက်အယ်လစ္စတာကို ဥရောပထိပ်သီးရီးရဲလ်မက်ဒရစ်ဆီ ကမ်းလှမ်းခဲ့တယ်လို့ သိရပေမဲ့ အခုတော့ အီရာအိုလာကိုယ်တိုင်က သူတို့ရဲ့အကောင်းဆုံးကွင်းလယ်ကစားသမားတစ်ဦးကို လက်လွှတ်ဖို့ ဆန္ဒမရှိဘူးလို့ အတည်ပြုခဲ့လို့ မီကွယ်လ်ဆာရာနိုရဲ့သတင်း မဟုတ်မှန်ဘူးလို့ ယူဆရပါတယ်။

မက်အယ်လစ္စတာရဲ့ဖခင်ဖြစ်သူ ကားလို့စ်မက်အယ်လစ္စတာကလည်း အပြောင်းအရွှေ့သတင်းတွေကို အမြဲတမ်းငြင်းဆိုလေ့ရှိသလို အာဂျင်တီးနားကြယ်ပွင့်ရဲ့အနာဂတ်က လာမယ့်ရာသီ၊ ချန်ပီယံဆုအတွက် ကြိုးပမ်းမယ့် လီဗာပူးအသင်းမှာပဲ ရှိနေမယ်လို့ ယူဆရပါတယ်။ 

"ရီးရဲလ်မက်ဒရစ်တာဝန်ရှိသူတစ်ဦးတစ်ယောက်နဲ့မှ စကားမပြောရသေးပါဘူး။ ရီးရဲလ်မက်ဒရစ်နဲ့ ဆွေးနွေးနေတယ်ဆိုတဲ့ သတင်းတွေ မမှန်ကန်ပါဘူး" လို့ သူက ဆိုပါတယ်။