ကမ္ဘာ့ဖလားဗိုလ်လုပွဲအပြီး လီယွန်နယ်မက်ဆီကိုယ်တိုင် အနားကပ်ပြီး ဘာပြောခဲ့သလဲဆိုတာကို ယာမယ်လ်က ပြန်ပြောင်းပြောပြလာပါတယ်။

နယူးယောက်/နယူးဂျာစီကွင်းဗိုလ်လုပွဲမှာ စပိန်က အာဂျင်တီးနားကို ဖာရန်တောရက်စ်ရဲ့ အချိန်ပိုသွင်းဂိုးနဲ့ အနိုယူပြီး ၂၀၁၀ ပြည့်နှစ်နောက်ပိုင်း ပထမဆုံးအကြိမ် ကမ္ဘာ့ဖလားချန်ပီယံဆုကို ရရှိခဲ့ပါတယ်။ 

ဒီနိုင်ပွဲကြောင့်ပဲ အာဂျင်တီးနားရဲ့ နှစ်ကြိမ်ဆက်ကမ္ဘာ့ချန်ပီယံဖြစ်စေဖို့ ရည်မှန်းချက် ကျိုးကြေခဲ့သွားခဲ့ပါတယ်။ 

အခုဗိုလ်လုပွဲအပြီး အသက်-၁၉ နှစ်အရွယ်ယာမယ်လ်က ကမ္ဘာ့ဖလားရော၊ ယူရိုဖလားပါ ဆွတ်ခူးနိုင်တဲ့ အသက်အငယ်ဆုံးကစားသမားအဖြစ် သမိုင်းမှတ်တမ်းသစ် ရေးထိုးနိုင်ခဲ့ပါတယ်။

ဒါ့အပြင် အခုကမ္ဘာ့ဖလားပြိုင်ပွဲမှာ ရှစ်ဂိုးအထိ သွင်းယူနိုင်ခဲ့တဲ့ မက်ဆီကလည်း ပွဲပြီးဆုံးချိန်မှာတင် ယာမယ်လ်ကို စကားပြောဆိုခဲ့ပါတယ်။ လတ်တလောမှာတော့ အင်တာမီယာမီကြယ်ပွင့်က သူ့ကို ဘာတွေပြောခဲ့သလဲဆိုတာ ယာမယ်လ်ကိုယ်တိုင် ဖွင့်ဟလာပါတယ်။

"မက်ဆီက ကျွန်တော့်ကို အခုသွားနေတဲ့လမ်းအတိုင်းပဲ ဆက်သွားဖို့နဲ့ အနာဂတ်ဆိုတာ ကျွန်တော်တို့ မျိုးဆက်ရဲ့လက်ထဲမှာပဲ ရှိတယ်လို့ ပြောခဲ့ပါတယ်။ ဒီစကားတွေက ကျွန်တော့်လည်ပင်းမှာ ဆွဲထားတဲ့ ရွှေတံဆိပ်လိုပဲ အဓိကကျသလို အဓိပ္ပာယ်လည်း ရှိပါတယ်" လို့ ယာမယ်လ်က ဆိုပါတယ်။

"မက်ဆီဆိုတာ ကျွန်တော် အမြဲတမ်း အားကျရတဲ့သူပါပဲ။ ပွဲအပြီးမှာ ကျွန်တော် သူ့ကို လေးစားကြောင်း ပြသခဲ့ပါတယ်" လို့လည်း ယာမယ်လ်က ထည့်ပြောခဲ့ပါတယ်။

ဗိုလ်လုပွဲမတိုင်ခင်မှာလည်း ယာမယ်လ်နဲ့ပတ်သက်လို့ မက်ဆီက "တကယ့်ကို ထူးချွန်တဲ့ ကစားသမားဖြစ်သလို ကမ္ဘာ့အဆင့်ကြယ်ပွင့်တစ်ဦးလည်း ဖြစ်ပါတယ်။ အခုမှ အသက် ၁၉ နှစ်ပဲ ရှိသေးတာဆိုတော့ သူ့ရှေ့မှာ လျှောက်လှမ်းရမယ့် ကစားသမားဘဝ ခရီးလမ်းတွေ အများကြီးကျန်နေပါသေးတယ်" လို့ ချီးကျူးခဲ့ဖူးပါတယ်။

၂၀၀၇ ခုနှစ်၊ UNICEF အလှူဒါနအတွက် ပြုလုပ်ခဲ့တဲ့ ပြက္ခဒိန်ဓာတ်ပုံရိုက်ကူးရေးမှာ မက်ဆီကိုယ်တိုင် ၅ လသားအရွယ်ယာမယ်လ်ကို ရေချိုးပေးနေတဲ့ပုံက လတ်တလော နာမည်ကြီးလာခဲ့ပါတယ်။ ဒါက သူတို့နှစ်ဦးအကြား တကယ့်ကိုထူးခြားတဲ့ ပတ်သက်မှုရှိနေပုံရပြီး မက်ဆီအနားယူမယ့်အချိန် ယာမယ်လ်က အာဂျင်တီးနားကြယ်ပွင့်ရဲ့နေရာကို ဆက်ခံသွားမယ့်ပုံစံမျိုး ဖြစ်နေပြန်ပါတယ်။