အက်စတွန်ဗီလာက ပိုပြီးတောင့်တင်းလွန်းတယ်လို့ ဝက်စ်ဟမ်းနည်းပြ နူနို ဝန်ခံ
တနင်္ဂနွေနေ့က ကစားခဲ့တဲ့ပွဲစဉ်မှာ ဝက်စ်ဟမ်းအသင်းက အက်စတွန်ဗီလာကို ၂ ဂိုး - ၀ ဂိုးနဲ့ ရှုံးနိမ့်ခဲ့ပြီးနောက် ဗီလာအသင်းဟာ သူတို့ထက် ပိုပြီးတောင့်တင်းခဲ့တယ်လို့ ဝက်စ်ဟမ်းနည်းပြ နူနိုဆန်တိုက ဝန်ခံပြောကြားခဲ့ပါတယ်။ ဒီရလဒ်ကြောင့် ဝက်စ်ဟမ်းဟာ ပရီးမီးယားလိဂ်ရဲ့ တန်းဆင်းဇုန်ထဲကို ရောက်ရှိသွားခဲ့ပြီး အောက်ခြေကနေရေတွက်ရင် တတိယမြောက်နေရာမှာ ရှိနေပါတယ်။
ပွဲအပြီးမှာတော့ နူနိုဆန်တိုက "ကျွန်တော်တို့ အသင်းကောင်းတစ်သင်းနဲ့ ကစားပြီး ရှုံးခဲ့တာပါ။ သူတို့က ကျွန်တော်တို့ထက် ပိုကောင်းပြီး ပိုတောင့်တင်းပါတယ်။ ဒုတိယပိုင်းမှာ လူစားလဲမှုတချို့ လုပ်ခဲ့လို့ အနည်းငယ် တိုးတက်လာပေမဲ့ ပွဲရလဒ်ကို ပြောင်းလဲနိုင်ဖို့အထိတော့ မလုံလောက်ခဲ့ပါဘူး" လို့ ပြောပါတယ်။
"နိုင်ငံတကာပွဲစဉ်တွေကြောင့် နားရက်မတိုင်ခင် အခုလို ခံစားချက်မျိုးနဲ့ သွားရတာ မကောင်းပါဘူး။ ကျွန်တော်တို့ ဒီထက်ပိုကောင်းအောင် လုပ်ရမယ်ဆိုတာကို သဘောပေါက်ပါတယ်။ လုပ်စရာတွေ အများကြီး ရှိပါသေးတယ်။ ကျွန်တော်တို့ ကောင်းကောင်းမကစားနိုင်ခဲ့ဘူး၊ ဒါကို ပြန်တုံ့ပြန်ရမယ်၊ ပိုကောင်းအောင် လုပ်ရမယ်၊ ကျွန်တော်တို့ကတော့ တိုက်ပွဲဝင်နေဆဲပါ။ ဒါဟာ အမှားတွေကို ပြန်သုံးသပ်ပြီး ဒီထက်အများကြီး ပိုကောင်းအောင် လုပ်ရမယ်ဆိုတာကို သိနားလည်ရမယ့် အချိန်ပါပဲ။ ဒီနေ့မှာ ပရိသတ်တွေ ကျွန်တော်တို့အပေါ် စိတ်ပျက်သွားကြမယ်လို့ ထင်ပါတယ်၊ အဲဒါက ကျွန်တော့်ကို အနာကျင်စေဆုံးပါပဲ" လို့လည်း သူက ဆိုပါတယ်။
ဆက်လက်ပြီး သူက "ခြေစွမ်းက မကောင်းခဲ့ပါဘူး။ ပထမပိုင်းမှာ ကျွန်တော်တို့ တစ်ချက်ကလေးမှ အဆင်မပြေခဲ့ဘူး၊ ပြေးနိုင်လွှားနိုင်တာမျိုး၊ ဖိအားပေးတာမျိုး မလုပ်နိုင်ခဲ့သလို ဘောလုံးလုတာတွေမှာလည်း အများကြီး ရှုံးနိမ့်ခဲ့ပါတယ်။ အသင်းက မှန်ကန်တဲ့ အနေအထားမှာ ရှိနေတယ်လို့ ကျွန်တော် တစ်ခါမှ မခံစားခဲ့ရပါဘူး။ ဒုတိယပိုင်းမှာ အနည်းငယ် တိုးတက်လာပေမဲ့ ခြုံငုံကြည့်မယ်ဆိုရင် ကျွန်တော်တို့ထက် ပိုကောင်းတဲ့ အသင်းတစ်သင်းကို ရှုံးခဲ့တာပါ။ ပြီးခဲ့တဲ့ အပတ်တွေတုန်းက ကျွန်တော်တို့ တကယ်ကို ကောင်းခဲ့ကြပေမဲ့ ဒီနေ့မှာတော့ အသင်းက သက်တောင့်သက်သာရှိနေတယ်လို့ လုံးဝမခံစားခဲ့ရပါဘူး။ အခုတော့ နိုင်ငံတကာပွဲသွားကစားမယ့် ကျွန်တော်တို့ရဲ့ ကစားသမားတွေ ဒဏ်ရာမရဘဲ ကျန်းကျန်းမာမာနဲ့ ပြန်လာနိုင်ဖို့ မျှော်လင့်ပြီး အကောင်းဆုံး ပြန်စသွားပါမယ်" လို့လည်း ပြောကြားသွားခဲ့ပါတယ်။
