အာဆင်နယ်နောက်ခံလူ ဂါဘရီယယ်ဟာ ဒူးဒဏ်ရာရရှိခဲ့တာကြောင့် ဒီတစ်ပတ်မှာ ကစားမယ့် ဘရာဇီးလ်လက်ရွေးစင်အသင်းကနေ နုတ်ထွက်လိုက်ပါတယ်။

 ဂျူရီယန် တင်ဘာ၊ အီဇီ၊ ဝီလျံ ဆာလီဘာနဲ့ လီယန်ဒရို ထရော့ဆတ်တို့ဟာ ဒဏ်ရာတွေကနေ ပြန်လည်သက်သာလာဖို့အတွက် မြောက်လန်ဒန်မှာပဲ ဆက်နေပြီး အနားယူသွားမယ်လို့ သတင်းထွက်ပေါ်လာပြီးနောက်မှာ ဂါဘရီယယ်ဟာ နိုင်ငံတကာပွဲစဉ်တွေကနေ နုတ်ထွက်လိုက်တဲ့ ၅ ယောက်မြောက် ကစားသမား ဖြစ်လာခဲ့ပါတယ်။

ဘရာဇီးလ်ဘောလုံးအဖွဲ့ချုပ်ကတော့ ဂါဘရီယယ်ဟာ ညာဘက်ဒူးပြဿနာကြောင့် ပြင်သစ်၊ ခရိုအေးရှားတို့နဲ့ ကစားမယ့် ခြေစမ်းပွဲစဉ်တွေမှာ ပါဝင်နိုင်မှာ မဟုတ်ဘူးလို့ ကြေညာခဲ့ပါတယ်။ "အာဆင်နယ်နောက်ခံလူ ဂါဘရီယယ် မာဂါဟေးစ်ဟာ ပြင်သစ်နဲ့ ခရိုအေးရှားတို့နဲ့ပွဲတွေကို လွဲချော်မှာပါ။

ပြီးခဲ့တဲ့ တနင်္ဂနွေနေ့က မန်စီးတီးနဲ့ ကစားခဲ့တဲ့ လိဂ်ဖလားဗိုလ်လုပွဲအပြီးမှာ ကစားသမားက သူ့ရဲ့ ညာဘက်ဒူး နာကျင်နေတယ်လို့ ပြောခဲ့ပါတယ်။ ဓာတ်မှန်ရိုက် စစ်ဆေးချက်တွေအရ ဂါဘရီယယ်ဟာ အခု ကမ္ဘာ့ဘောလုံးအဖွဲ့ချုပ် (FIFA) နိုင်ငံတကာပွဲစဉ်တွေမှာ ကစားဖို့ ကြံ့ခိုင်မှု မပြည့်ဝဘူးဆိုတာ အတည်ပြုနိုင်ခဲ့ပါတယ်၊ သူ့အစား တခြားကစားသမားကိုလည်း ထပ်မံခေါ်ယူမှာ မဟုတ်ပါဘူး" လို့ အဖွဲ့ချုပ်က ဆိုပါတယ်။

အခုသတင်းဟာ နော်ဝေအသင်းမှာ မာတင် အိုဒီဂတ် မပါဝင်နိုင်သလို၊ ဘရာဇီးလ်အသင်းမှာလည်း အက်စတီဗာအို ချန်လှပ်ခံထားရတဲ့ သတင်းတွေနောက်မှာ ထပ်မံ ထွက်ပေါ်လာတာလည်း ဖြစ်ပါတယ်။ အာဆင်နယ်အသင်းဟာ နိုင်ငံတကာပွဲစဉ်တွေအပြီး လာမယ့် စနေနေ့မှာ ဆောက်သမ်တန်အသင်းနဲ့ အက်ဖ်အေဖလား ကွာတားဖိုင်နယ် ပွဲစဉ်အဖြစ် ရင်ဆိုင်ရမှာဖြစ်ပြီး ၃ ရက်အကြာမှာတော့ ချန်ပီယံလိဂ်ပွဲစဉ်အဖြစ် စပို့တင်းအသင်းနဲ့ ကစားရမှာပါ။

အာဆင်နယ်ဟာ ၂၀၂၀ ခုနှစ်နောက်ပိုင်း ပထမဆုံးဆုဖလားနဲ့ ဆုဖလား ၃ လုံးရရှိဖို့ ကြိုးပမ်းနေတာကြောင့် နည်းပြ မီကေးလ် အာတီတာကတော့ ကလပ်ပွဲစဉ်တွေ ပြန်မစခင်မှာ သူ့ရဲ့ကစားသမားတွေ ဒဏ်ရာကနေ အမြန်ဆုံး သက်သာလာဖို့ မျှော်လင့်နေမှာ ဖြစ်ပါတယ်။